जोरव जोरव जोरव जोरन हो / दुकालू यादव

जोरव जोरव जोरव जोरन हो
मोर दुर्गा दाई के होवत हे बिदाई 2
चल चल दीदी चल मोर भाई
सगुरी जावत हे महामाई
मोर दुर्गा दाई के होवत हे बिदाई 2

तोर बिराजत गांव शहर हा सरग बरोबर लागे
रिगबिग रिगबिग बिजली बरे ओ रतिहा दिन अस लागे
--रतिहा दिन अस लागे ओ दाई रतिहा दिन अस लागे--
मया के बंधना मा नौ दिन बांधे बिदा के बेरा आगे
संग तोर छुटती लागे उदासी आँखी ले आँसू बोहागे
-- आँखी ले आँसू बोहागे ओ दाई आँखी ले आँसू बोहागे --

सुन्ना सुन्ना घर अऊ अंगना लागत हे भारी करलाई
मोर दुर्गा दाई के होवत हे बिदाई 2

बच्छर भर बर जोरव जोरन कंगी कोकई कोरन
लुगरा पोलखा चुनरी चोली आमा पान के तोरन
--आमा पान के तोरन ओ दाई आमा पान के तोरन--
सुपली टुकनी तेल के गुंडी पेरे चांउर के जोरन
टिकली फूंदरी चूरी मुंदरी बंदन चंदन दर्पन
-- बंदन चंदन दर्पन बंदन चंदन दर्पन --

मुंगा मोती जंवा अऊ तिल्ली मैया बर चना गुड़ लाई
मोर दुर्गा दाई के होवत हे बिदाई 2

सगरी नहावन चले महामाई मांग भरे बम लाली
नाचत गावत चले सेउक मन उड़े अबीर गुलाली
-- उड़े अबीर गुलाली ओ दाई उड़े अबीर गुलाली --
जोत जंवारा होत विसर्जन आज हा लागे काली
अऊ आबे जगजननी दुर्गा अंबे शेरावाली
--अंबे शेरावाली ओ दाई अंबे शेरावाली --

परमानंद काठोलिया बर तै माता होगेस पहूंनाई
मोर दुर्गा दाई के होवत हे बिदाई 2

जोरव जोरव जोरव जोरन हो
मोर दुर्गा दाई के होवत हे बिदाई 6

गीत - जोरव जोरव जोरव जोरन हो
प्रकार - जस गीत
सिंगर - दुकालू यादव
लेखक - परमानन्द कठोलिया
म्यूजिक कंपनी - KK CASSETTE