तोर मया के कईसे दाई करौ मै बखान

तोर मया के कईसे दाई करौ मै बखान

खोजे घलो मा नई मिले मयारू कहना मान

तोर ममता हा जग मा सबले महान

तोला पा के लागे मिलगे मोला ओ भगवान

समुन्दर ले गहिरा तोर प्रेम हे

पहाड़ घलो ले उपर हे

चन्दा अउ चंदइनी ले दाई तोर मया हा उज्जर हे

तोर पिरित के भुईया मा माड़े मोर पाँव

तै तो आगास बन के करै मोर बर छाँव

तोर ममता हा जग मा सबले महान

तोला पा के लागे मिलगे मोला ओ भगवान

हिरदय ले तोर मया जुग जुग ले नई सिराये

अंतस म पिरित के अतका खजाना भराये

गंगा अउ जमुना अस मया तोर निर्मल

नैना मा तोर दाई नई हे कपट छल

अंधियारी जिनगी म करे अंजोरी तोर ममता के चिमनी

पिरित ला तोर पा के तरगे मोर जिनगी

तोर ममता हा जग मा सबले महान

तोला पा के लागे मिलगे मोला ओ भगवान