ए हो मोहनी मुरतिया हे तोर

ए हो मोहनी मुरतिया हे तोर मैया शारदे

पावे मा दाई पैजन कनिहा मा हासे करधन

तोला रूचमुच सेऊक राखे हे सिंगार के

ए हो मोहनी मुरतिया हे तोर मैया शारदे

सौ सुरूज कस मुख मण्डल हे  छवि बरनि ना जाए

माथा के टिकली जस चंदा हे जे रूप ला समराए

नाक के फुल्ली लागे चंदैनी जोगनी अस मुसकाए

कान करन फुल कान मा लटके पियर रंग दर्शाए

नयन दिखे वो कटारी करे भगत हितकारी

ये मोला बईहा मा लेके दाई तै दुलार दे

ए हो मोहनी मुरतिया हे तोर मैया शारदे

#

नयन मा काजर बादर अस हे सिर के मुकुट झलकाए

मखमल लुगरा पोलखा अंग मा लाली रंग बरखाए

यहो बाहा बहुटिया मौरी बहुची सिद्द रूप  मा समाए

बाह भर चुरी पटा सुहाए सुहागिन पद पाए

सबके मईके तोर अंगना  तेकर दाई का कहना

ए मोर बुडत  जिनगी ला दाई तै सवार दे

ए हो मोहनी मुरतिया हे तोर मैया शारदे

#

हाथ मा मेहंदी अंगरी मा मुंदरी नव नव रतन सुहाए

हिरा पन्ना मुंगा मोती ले गल माला मुसकाए

मुड मा गजरा चम्पा चमेली दशमत मन ला भाए

अवरी मा माहुर अंगरी मा बिछिया गुन गुन के दोहराए

कांती कार्तिक हे सिंगारे मौनी लाला हे दुवारे

छोटे नदिया ला  दाई तै करार दे

ए हो मोहनी मुरतिया हे तोर मैया शारदे

#

पावे मा दाई पैजन कनिहा मा हासे करधन

तोला रूचमुच सेऊक राखे हे सिंगार के

ए हो मोहनी मुरतिया हे तोर मैया शारदे