तोर कोरा के खेलईया लईका आन ओ
तोर कोरा के खेलईया लईका आन ओ
तोर कोरा के खेलईया लईका आन ओ
दुख मा गोहराथन सुख मा टेहराथन
दुख मा गोहराथन सुख मा टेहराथन
नोहन हमन विरान ओ
खेल खेल मा मनगढ़ना ले आनी बानी खेल खेलथन
गिरत पड़त लड़त झगड़त अंगना मा किलकोरथन
धानी मुंदी रेस टीप अउ गोटा ला घलो सकेलथन
टिपरी टिपरा अउ भटकउला आंख आंखी गोटा रेंगथन
खोखो कबड्डी जीतम जीती
खोखो कबड्डी जीतम जीती खेल मा देखाये परमान ओ
खेल खेल मा अंगना मा तोरे फूगड़ी खेलत बहारथन
पानी पानी के खेल खेल मा छरा छिटका ला डारथन
लाली पिवरी सादा रंग मा अंगना ला तोर खुटियाथन
चांउर पिसान के चौक चंदन सुग्घर हमन पुराथन
बांन किड़बिड़ हा परे पानी पिड़हा
बांन किड़बिड़ हा परे पानी पिड़हा लोटा भर पानी परधान ओ
माटी माटी के ठेका दूंहूनी रंधनी गढ़नी गढ़ डारेव
खेल खेल मा दार भात अउ साग घलो रांध डारेव
भाव के सेती पानी पिड़हा जेवन बनेवत डारेव
बन बुटा के रेती गोटी ला अन्न रूप मा भर डारेव
कांतिकार्तिक घलो खेले खेलौना
संग मा मौनी लाला रखे ऐही भावना
पौरी मा ओधाये हन परान ओ
दुख मा गोहराथन सुख मा टेहराथन
दुख मा गोहराथन सुख मा टेहराथन
नोहन हमन विरान ओ
तोर कोरा के खेलईया लईका आन ओ
तोर कोरा के खेलईया लईका आन ओ
✍ लेखक: ओपी देवांगन
🎤 प्रस्तुतकर्ता: -
