सगुरी नहाये ला जाये आदि भवानी-पूरण साहू

-

मुखड़ा :

सगुरी नहाये ला जाये आदि भवानी… (2)

हो आघु-आघु रेगय लंगुरे 2

पाछु दुर्गा रानी…

सगुरी नहाये ला जाये आदि भवानी… (2)

--

अंतरा 1 :

देवलोक ले देवी उतरे, दरसन दे बर आये।

नवदिन जोत नवरूप बिराजे, जोत अखंड जलाये।

हो पावे देवी दरसन जौंने… (2)

रहे भागमानी…

सगुरी नहाये ला जाये आदि भवानी… (2)

--

अंतरा 2 :

बाना बोहय बघदेवा हा, भैरव छत्र डोलाये।

आरती साजे चौसठ जोगनी, किलकत संग मा जाये।

हो भर घैला ठांव-ठांव ढारे… (2)

पनिहारिन पानी…

सगुरी नहाये ला जाये आदि भवानी… (2)

--

अंतरा 3 :

बोहे सुहागिन जोत कलश ला, नंदी खप्पर साजे।

संखियन रेंगे बोहके जंवारा, दुलरु झूमे नाचे।

हो लहर-लहर लहरा मारे… (2)

गंगा महरानी…

सगुरी नहाये ला जाये आदि भवानी… (2)

--

अंतरा 4 :

होगेस पहुना आज वो दाई, बता दे अउ कब आबे।

मोर मन मंदिर भीतरी मा, मया के जोत जगादे।

हो प्रेम पूरण के रखबे… (2)

नाम तैं निशानी… (2)

सगुरी नहाये ला जाये आदि भवानी… (2)

--

समापन (टेक) :

हो आघु-आघु रेगय लंगुरे… (2)

पाछु दुर्गा रानी…

सगुरी नहाये ला जाये आदि भवानी (2)

--