करे सेवुक तोर आरती दीया थारी ला सजाके -कुंजलाल साहू

--

🌺 जसगीत (आरती)

मुखड़ा:

करे सेवक तोर आरती, दीया थारी ला सजाके,

दीया थारी ला सजाके॥

करे सेवक तोर आरती, दीया थारी ला सजाके,

दीया थारी ला सजाके॥

उड़ान:

यहो तोला मनावंव, अरजी गुजारंव, तोर दुवारी म जाके॥2॥

करे सेवक तोर आरती, दीया थारी ला सजाके,

दीया थारी ला सजाके॥

--

अंतरा 1:

यहो पान-फूल, नरियर, लिमऊ ले तोला भेंट चढ़ायें,

कंचन थारी म दियना जलाके, तोर दुवारी म आयें॥

ध्वजा पताका तोर मंदिर म लहर-लहर लहराय,

बैगा-बामन तोर चरण म, निसदिन माथ नवाय॥

उड़ान:

यहो अगर, कपूर अउ धूप-दीप, तोर दुवारी जलायें॥2॥

करे सेवुक तोर आरती...

--

अंतरा 2:

यहो सबके बिगड़े तैं ही बनइया, हावस मोर महतारी,

दुख-पीड़ा के तैं ही हरइया, तोर महिमा हे न्यारी॥

जेहर तोर दुवारी जाही, सरधा ले माथ नवाय,

पलभर म तैं ओखर दाई, दुख-पीड़ा हरजाय॥

उड़ान:

यहो दुख के हरइया, सुख के देवइया, तोला माथ नवायें॥2॥

करे सेवुक तोर आरती...

--

अंतरा 3:

यहो कोनो तोला काली कहिथे, कोनो कहे बमलाई,

कोनो तोला बंजारी कहिथे, कोनो कहे समलाई॥

दुर्गा, चंडी, माता भवानी, नाम अनेकों जनाय,

गांव-गांव म शीतला बनके, रहिथस सबके सहाय॥

उड़ान:

यहो विपत परे म साथ निभायस, रूप अनेक बनायें॥2॥

करे सेवुक तोर आरती...

--

अंतरा 4:

यहो जगह-जगह म मेला भरथे, जाथें सब नर-नारी,

नव दिन रतिहा तोला मनाथें, सुमर-सुमर के भवानी॥

कोनो तोरे जोत जलाके, अपन मनौती मनाय,

जग-जवारा बोके दाई, भाग अपन सहुराय॥

उड़ान:

यहो मन म खुशी अपार समाय, तोर दरसन ल पायें॥2॥

करे सेवुक तोर आरती...

--

अंतरा 5:

यहो हम अड़हा अज्ञानी दाई, तोर सेवा म आयें,

माया शक्ति तोर नई जानन, जस महिमा गाये॥

हम तोरे लइका दाई, हमन ला झन भुलाबे,

अपन मया के अंचरा के छैया, हमरो बर लमाबे॥

उड़ान:

यहो ये चोला हमरो तर जाही, तोर आशीष ल पायें॥2॥

करे सेवुक तोर आरती दीया थारी ला सजाके,

दीया थारी ला सजाके।

--