दाई तोर आंखी ले बरसे पानी
पानी रे पानी रे पानी बरसे पानी
पानी रे पानी रे पानी बरसे पानी दाई तोर आंखी ले बरसे पानी
नंदिया नरवा छलकत हे धरती सिंगार करत हे
नंदिया नरवा छलकत हे धरती सिंगार करत हे
तोर हाथ मे सब के जिनगानी दाई तोर आंखी ले बरसे पानी
सुख के दिन हा बित गे सुख मे दुख के दिन हा दुकाल ओ
यहो बिन पांनी के टेटका मेचका मछरी मगर बिन हाल ओ
साजा सरई सइगोन के पाना बिजा बमरी साल ओ
यहो भूखमरी के काल हा आगे सुरूज दिखे लाले लाल ओ
माता के ममता बरस के आंखी ले आंसु ढ़रक गे
माता के ममता बरस के आंखी ले आंसु ढ़रक गे
फूट फूट के रोवै शीतला भवानी दाई तोर आंखी ले बरसे पानी
करीया बादर गरजे जम के पवन चलै पुरवईया ओ
यहो मंजुर हा दुनो डेना बगरा के नाचे ताता थैया ओ
चिव चिव बोले चिरई चिरगुन कांव कांव कौआ करिया ओ
यहो नांगर बईला फांद के जम्मो खेत में चले नंगरिया ओ
लहराये धान अउ गहूं ठेलहा नई रहे कहूं
लहराये धान अउ गहूं ठेलहा नई रहे कहूं
किसान करे खेती किसानी दाई तोर आंखी ले बरसे पानी
शीतला माता ला शांत करे बर माता देवाला म जाथे ओ
यहो पिवरा पिवरा हरदी के पानी नीम के छाटा लगाथे ओ
हुम अगियारी नरियर भेला घी के दियना जलाथे ओ
यहो पांच भगत मिल करे आरती सेउक जस ला गाथे ओ
माता के करे जयकारी कोसरिया मा के दुआरी
माता के करे जयकारी कोसरिया मा के दुआरी
दास प्रेम करे अघुवानी दाई तोर आंखी ले बरसे पानी
नंदिया नरवा छलकत हे धरती सिंगार करत हे
हो नंदिया नरवा छलकत हे धरती सिंगार करत हे
तोर हाथ मे सब के जिनगानी दाई तोर आंखी ले बरसे पानी
पानी रे पानी रे पानी बरसे पानी दाई तोर आंखी ले बरसे पानी
हो दाई तोर आंखी ले बरसे पानी
दाई तोर आंखी ले बरसे पानी
✍ लेखक: दुकालू यादव
🎤 प्रस्तुतकर्ता: KK CASSETTE
