तरहिच नारी नाहना हो माय नाहा नारी नाहना ये वो-गजेन्द्रसिंह ठाकुर

तरिहच नारी नाहना हो माय...

मुखड़ा (स्थायी):

तरिहच नारी नाहना हो माय, नाहा नारी नाहना ये वो।

तरिहच नारी नाहना हो माय, जब झूलय माता झूलना मा वो॥

हो जब झूलय माता झूलना मा वो॥2॥

तरिहच नारी नाहना हो माय, नाहा नारी नाहना ये वो।

तरिहच नारी नाहना हो माय, जब झूलय माता झूलना मा वो॥

1️⃣ अंतरा

चैत महिना बन ले माय चंदन लकड़ी मंगायेव वो।

बैशाख महिना छोल चांचके, ढेलवा रायचुली बनायेव वो॥

जेठ महिना जड़ेव नगीना, हीरा मोती के का कहना।

आनी बानी के जेवर गहना, सुघर माते सिरी के अंगना॥

रुचमुच बड़ शोभा लागय वो...

हो जब झूलय माता झूलना मा वो॥2॥

तरिहच नारी नाहना हो माय,नाहा नारी नाहना ये वो।

तरिहच नारी नाहना हो माय,जब झूलय माता झूलना मा वो।।

2️⃣ अंतरा

आषाढ़ महीना में तोर बर माय, सोन के छतरी मंगायेव वो।

टिकली सेंदुर बंदन चुड़ी,जोरा तोर जोरायेव वो॥

लाली लुगरा, लाली फुंदरा, लाली मुड़ के लाली सेंदुरा।

सुरुज जोत कस चमकत हे अछरा, गैंदा गुलाब के मुड़ में गजरा॥

रुचमुच बड़ शोभा लागय वो...

हो जब झूलय माता झूलना मा वो॥2॥

तरिहच नारी नाहना हो माय नाहा नारी नाहना ये वो।

तरिहच नारी नाहना हो माय,जब झूलय माता झूलना मा वो।।

3️⃣ अंतरा

सावन महिना तोर बर माय, सावन झूला गड़ायेव वो।

फुल फुल के सुंदर सेज, डोरी अउ फुंदरा गथायेव वो॥

हाथ जोड़ के व्रत ला करके, पूजा पाठ ला करंव सुमर के।

झूलना मा फेर लानेव धरके, महामाई तोर पांव ला परके॥

रुचमुच बड़ शोभा लागय वो...

हो जब झूलय माता झूलना मा वो॥2॥

तरिहच नारी नाहना हो माय,नाहा नारी नाहना ये वो।

तरिहच नारी नाहना हो माय,जब झूलय माता झूलना मा वो।।

4️⃣ अंतरा

एक्कीस तोरे बहिनी ला माय, नेवता फेर भेजवांयेव वो।

पतिया भेजव लिख लिख मैं, सेवा मा तोला बलवायेंव वो॥

एक्कीस बहिनी आंखी जुड़ौनी, खेले आके झूलना झुलौनी।

लंगुरे रिसाये खोजे मनौनी, लाने प्रेम बस सबो खिलौनी॥

रुचमुच बड़ शोभा लागे वो...

हो जब झूलय माता झूलना मा वो॥2॥

समापन (मुखड़ा)

तरिहच नारी नाहना हो माय, नाहा नारी नाहना ये वो।

तरिहच नारी नाहना हो माय, जब झूलय माता झूलना मा वो॥