मया रंग धरे हव मयारू

मया रंग धरे हव मयारू मया रंग ला लगाये बर

रंग ला लगाये बर मन ला रंगाये बर

मया रंग धरे हव मयारू मया रंग ला लगाये बर

रंग मया के तै अरथ का लगाये हस

मन हा मछरी बन के कलपे बिन पानी कस

एक नजर देख लेतेव तोला मै हाँसत

फगवा संग अलिन गलिन रहितेव मै नाँचत

मन मोर गदके रे मयारू तोर दरस ला पाये बर

मया रंग धरे हे मयारू मया रंग ला लगाये बर

का काजर के डबिया मा चंदा हा लुकाये हे

कब आही मोर पुन्नी समझ नई आये हे

मोर चंदा दिखे आज चुन्दी बगराये हे

ओठ के लाली गुलाब ला लजाये हे

झन तै भूलाबे मया वाली तोर मन ला मिलाये बर

मया रंग धरे हे मयारू मया रंग ला लगाये बर

मया अउ दया के रंग आनी बानी हे

पीरा संग पिरित हा संगी नादानी हे

रंग मा घूरे देखो नवा जिनगानी हे

जिनगी हा चार दिन आनी अउ जानी हे

रंग रसियाये हव दिवानी दिन लहुट नई आये बर

मया रंग धरे हे मयारू मया रंग ला लगाये बर

डह के धुन में भेद घोरेव थोरिक सुन तै लेबे

अंतस के गोठ गोरी सुन के गुन लेबे

हरा पीला लाल रंग ला ओठ मा चुम लेबे

कान्तिकार्तिक के गीत मा तै झूम लेबे

मौनी लाला के निशानी मया पिरित बढ़ाये बर

मया रंग धरे हे मयारू मया रंग ला लगाये बर

रंग ला लगाये बर मन ला रंगाये बर

मया रंग धरे हव मयारू मया रंग ला लगाये बर