कुमवी ले उपजे मैया बंकासुर दानव हो

जसगीत-कुमवी ले उपजे मैया ...

(मां दुर्गा – बंकासुर दानव वध)

मुखड़ा

कुमवी ले उपजे मैया बंकासुर दानव हो...

देवता के करे वो विनाश हो माया मोर,

देवता के करे वो विनाश हो मां॥

--

अंतरा 1

बड़े बड़े देवता ला धर धर पटके हो,

छोटे मनके करथे आहार हो माया मोर॥2॥

--

अंतरा 2

अतका ला देखे वो मैया लाल लंगुरवा हो,

मन मन करथे विचार हो माया मोर॥2॥

--

अंतरा 3

लंगुरे हा दौड़त जावे गढ़ हिंगलाज में हो,

माता जी से करथे पुकार हो माया मोर॥2॥

--

अंतरा 4

लगे हे कछेरी मैया केवला नारायणी के हो,

घुमड़ लगे हे दरबार हो माया मोर॥2॥

--

अंतरा 5

काय कारण बर लंगुरे तैंहा चले आये हो,

काय पड़े हे तोला काम हो माया मोर॥2॥

--

अंतरा 6

हाथ जोड़ दुरगा दाई बिनती करत हंव हो,

बजरा पड़े हे मोला काम हो माया मोर॥2॥

--

अंतरा 7

कुमवी ले उपजे मैया बंकासुर दानव हो,

देवता के करे वो विनाश हो माया मोर॥2॥

बड़े बड़े देवता ला धर धर पटके हो,

छोटे मनके करथे आहार हो माया मोर ।।2।।

--

अंतरा 8

इतना ला सुने मैया केवला नारायणी हो,

लाली वो बरन होई जाय हो माया मोर॥2॥

--

अंतरा 9

एक हाथ मा खप्पर धरे, एक हाथ मा खाड़ा हो,

सिंह सवारी चले जाय हो माया मोर॥2॥

--

अंतरा 10

जाय पहुंच गे मैया कुमवा नगर मा हो,

गरजथे सिंह के समान हो माया मोर॥2॥

--

अंतरा 11

जेला सुनत हावे बंकासुर दानव हो,

फौजन करथे तैयार हो माया मोर॥2॥

--

अंतरा 12

कई जोड़ी बाजे मैया तुरही कन्डाल हा हो,

कई जोड़ी घुमरे निशाने हो माया मोर॥2॥

--

अंतरा 13

भारी घमासान होगे दोनों फौजन में हो,

मचे हे लड़ाई घमासान हो माया मोर॥2

--

अंतरा 14

घोड़ा ले गिर गये बंकासुर दानव हो,

दुर्गा के देवथे दुहाई हो माया मोर॥2॥

--

अंतरा 15

दुर्गा दाई हा मारे बंकासुर दानव हो,

देवता मन फूल बरसाए हो माया मोर॥2॥

--

अंतरा 16

पांच भगत मिल तोरे जस गावै हो,

जय जय बोलथे तुम्हार हो माया मोर॥2॥

--

अंतरा 17

दस अंगुरिया के मैया अरजी करत हो,

रहेहु चरण लिपटाये हो माया मोर॥2॥

--