काल अस बैरी बेरा उमियागे - कन्तिकर्तिक यादव
काल अस बैरी बेरा उमियागे
काल अस बैरी बेरा उमियागे
देखो संतो देखो कलयुग आगे
देखो संतो देखो कलयुग आगे
लोक लाज के होवे फदित्ता
कोन हा करही चिन्हारी गा
हिंसा मुहुरन म रकत बोहाए
गोठ नोहे लबारी गा
मजबुरी म करे मजुरी
चोरेच लाट छिन्हारी गा
ठग जग जाटू कारी वारी
बने हे पद अधिकारी गा
दाउ दरोगा बर
दाउ दरोगा बर
दाउ दरोगा के पाग हा आगे
देखो संतो देखो कलयुग आगे
देखो संतो देखो कलयुग आगे
नीति रीति ल बरेंडी म टांगे
मुहु देखी होवत हे नियाव गा
लबरा के करे हियाव गा
बिना गवाही देखे देवत हे
गीता के परत हे पांव गा
पंच में का परमेश्वर बसे हे
दिखथे का परभाव गा
सांच ल आंच कहां
सांच ल आंच काहां
सांच ल आंच कहां फेर लागे
देखे संतो देखो कलयुग आगे
देखे संतो देखो कलयुग आगे
जुरमी जुलूक करे मनमानी
परजीव ल कंदराए गा
बेरा के पासा उलटफेर हे
बेरा फिरत पछताए गा
परपीरा के दुख ल हांसे
अपन पीरा नई सहाए गा
गए दिन बहुरे नही रे संगी
बुद्धि घलो नई पाए गा
रस्सी हा जर गे फेर
रस्सी हा जर गे फेर
रस्सी हा जर गे अईठ नई भागे
देखे संतो देखो कलयुग आगे
देखे संतो देखो कलयुग आगे
नीति रीति अउ नियाव म
सउहे बसे भगवान गा
झूठ लबारी सरापा गारी म
झन बुड़ौ इनसान गा
नादानी ल करौ झन तुमन
कल के तुमन सुजान गा
कांतिकार्तिक मौनी लाला
कहे बेरा अवसान गा
नवा सुरूज फेर देखो
नवा सुरूज फेर देखो
नवा सुरूज फेर पंग पंगागे
देखे संतो देखो कलयुग आगे
देखे संतो देखो कलयुग आगे
काल अस बैरी बेरा उमियागे
काल अस बैरी बेरा उमियागे
देखो संतो देखो कलयुग आगे
देखो संतो देखो कलयुग आगे
✍ लेखक: -
🎤 प्रस्तुतकर्ता: KOK Creation
