भडौनी - हाथ गोड़ खसर्रा दिखे

हाथ गोड़ खसर्रा दिखे

खसर खसर खजवाए गा

के महिना ले नहाए नई हस

भकर भकर बस्साए गा

#

ए पाउच खा के पिच पिच थुके

मुहु म भरे तम्बाखु वो

दांत हा दिखथे करिया समधिन

घिसथस का गुड़ाखू वो

रेचका पेचका भाटो के भाई

आंखी दिखे बोटर्रा वो

कोन दिही एला लड़की बहिनी

खाए म हे गोबर्रा वो

ए समधिन

झन कर जादा अतलंग समधिन

बिहा के ले जाहूं वो

भवराहूं इही मड़वा म नई ते

उड़हरिया भगाहूं वो

#

सूट बूट पहिरे ले समधि

शाहरूख नई कहाए गा

शेर के खाला ओढ़े ले गदहा

शेर नई बन जावै गा

ए जींस मारे टॉप पहिरे

चश्मा लगाए हो

अंग्रेजी म गारी दे के

हमला का देखाए वो

#

दार रांधेव भात रांधेव

पसिया पसाऐंव वो

दुल्हा डउका के मेछा म

हंसिया दताएंव वो

सारी हाथ ले खा ले लाडू

भाटो बड़ा मिठाही गा

काली ले मोर बहिनी तोला

पैरा भूसा खवाही गा