बने करे राम मोला अंधरा बनाए
बने करे राम मोला अंधरा बनाए 2
आंखी मा देखे के दुख नई धराए
दिन रात मोर बर बराबर बनाए
मोर जिनगी मा सुरूज नई ऊवाए ||राम||
बने करे राम मोला अंधरा बनाए 2
सुने हावव दुनिया मा रंग रंग के शोर,
भुईया मा मनखे अऊ गद्दी मा ढोर
बडे बडे नेता उचाए हे देश,
रक्शा चरित्तर अउ साधु के भेष
ए सब के दर्शन करे ले बचाए 2 ||राम||
बने करे राम मोला अंधरा बनाए 2
दाई ला आंसु बोहावत नई देखव,
ददा ल चुप कसमसावत नई देखव
भाई ला अंगना खडावत नई देखव,
बेटा ला घर छोड जावत नई देखव
जऊने हा देखय उही छटपटाए 2
बने करे राम मोला अंधरा बनाए 2
गाना के मुखडा मा चिखला सने हे,
गुंडा अऊ बदमाश हिरो बने हे
तन हिरोइन के ओनहा ना चेंदरा,
लगथे नचईया मन सरकस के बेंदरा
नियत के नंगरा सिनेमा बनाए 2
बने करे राम मोला अंधरा बनाए 2
कोनो कोनो कइथे की ए बाबूलाल,
होके अलाल तै झडकथस ग माल
मै हा कथो सच काहे सुन ले सियान,
आंखी मुंदाथे त मिलथे गियान
दुनिया किंजर लेव 2 टिकिस बिन कटाए ||राम||
बने करे राम मोला अंधरा बनाए 2
बने करे राम मोला अंधरा बनाए 2
आंखी मा देखे के दुख नई धराए
दिन रात मोर बर बराबर बनाए
मोर जिनगी मा सुरूज नई ऊवाए ||राम||
बने करे राम मोला अंधरा बनाए 2
✍ लेखक: श्री रामेश्वर जी वैष्णव
🎤 प्रस्तुतकर्ता: -
