एक्कईसो बहिनिया के भैया ऐ लंगुरवा हे गा-रामफल कैवर्त

--

🌺 जसगीत: एक्कईसो बहिनिया के भैया

मुखड़ा:

एक्कईसो बहिनिया के भैया ऐ लंगुरवा

हे गा,

अमुवा राखन बर चले जाये हो मां ॥2॥

ऐ भाई मोर अमुवा राखन बर चले जाये

हो मां ॥2॥

--

अंतरा 1:

एक कोस रेंगय लंगुरे, अब दुई कोस

रेंगय गा,

नई तो दिखय कदली कछार हो मां ॥2॥

ये भाई मोर नई तो दिखय कदली कछार

हो मां ॥2॥

--

अंतरा 2:

तीसर कोसन रेंगय लंगुरे बिचारा गा,

पहुंचथे कदली कछार हो मां ॥2॥

--

अंतरा 3:

ये हाथ मा धरय भैया गोटी अउ गुलेलवा गा,

पहुंचथे कदली कछार हो मां ॥2॥

ये दुलरवा गा पहुंचथे कदली कछार हो मां ॥2॥

--

अंतरा 4:

ये अमुवा मा बैठय दु ठन कोयली अउ

सुवना गा,

मारय गुलेल अउ गिराये हो मां ॥2॥

--

अंतरा 5:

कोयली अउ सुवना ला ओली मा धरके गा,

मैया के दरश बर चले जाये हो मां ॥2॥

मोर दुलरवा मैया के दरश बर चले जाये

हो मां ॥2॥

--

अंतरा 6:

एक कोस रेंगय लंगुरे, दुई कोस रेंगय गा,

नई तो दिखय देवी के दरबार हो मां ॥2॥

--

अंतरा 7:

तीसर कोस रेंगय लंगुरे बिचारा गा,

पहुंचत हावय देवी दरबार हो मां ॥2॥

--

अंतरा 8:

मंदिर के चारो कोती घुमत हे लंगुरवा गा,

नई तो दिखय धरम दुवार हो मां ॥2॥

--

अंतरा 9:

ये महलों के तीर-तीर मा घुमत हे लंगुरवा गा,

नई तो दिखय धरम दुवार हो मां ॥2॥

--

अंतरा 10:

ये का तो बिगाड़ेव जलनी, का तो लठायेव वो

जड़ दिये बजुरा किवाड़ हो मां ॥2॥

--

अंतरा 11:

ये नई तो लठाये लंगुरे, नई तो बिगाड़े रे,

कोयली सुवना काबर लाये हो मां ॥2॥

--

अंतरा 12:

ये कोयली अउ सुवना ला छोड़त हे

लंगुरवा गा,

खुलन लागे धरम दुवार हो मां ॥2॥

ये माया वो खुलन लागे धरम दुवार हो मां ॥2॥

--